Click it and Unblock the Notifications
എവിടെത്തിരിഞ്ഞാലും ലൈംഗികതയുടെ അതിപ്രസരമാണ് ഇപ്പോള്‍. ടെലിവിഷനില്‍, ഇന്റര്‍നെറ്റില്‍, പുസ്തകങ്ങളിലൊക്കെ ലൈംഗികമയമാണ് കാര്യങ്ങള്‍. സംഗീതവും നൃത്തവും സെക്സില്‍ നിന്നും മുക്തമല്ല. ഉല്‍പ്പന്നങ്ങള്‍ വിറ്റഴിക്കുന്നതിനുളള പരസ്യങ്ങളിലും പ്രധാനഇനം സെക്സും സെക്സ് ബിംബങ്ങളുമാണ്. ഇതെല്ലാം ഒരുതരത്തിലല്ലെങ്കില്‍ മറ്റൊരു തരത്തില്‍ സെക്സിനുളള പ്രേരണ ജ്വലിപ്പിക്കും.
ഇതിനടിപ്പെടണോ വേണ്ടയോ എന്നത് വലിയ ചോദ്യമാണ്. ഈ ചോദ്യങ്ങള്‍ സ്വയം ചോദിക്കൂ.
1. സെക്സിനെക്കുറിച്ച് നിങ്ങളുടെ കുടുംബത്തില്‍ നിന്നും ലഭിക്കുന്ന സന്ദേശമെന്താണ്?
2. നിങ്ങളുടെ ഭാവി ജീവിതത്തെ സെക്സ് എങ്ങനെയാണ് സ്വാധീനിക്കുന്നത്? തൊഴിലിലോ പഠനത്തിലോ നിങ്ങള്‍ എത്തിച്ചേരാനാഗ്രഹിക്കുന്ന ഉയരത്തിലെത്തുന്നതിനെ നിങ്ങളുടെ ആദ്യസെക്സ് എങ്ങനെ ബാധിക്കും?
3. സെക്സിനെക്കുറിച്ച് നിങ്ങളുടെ ആത്മീയമോ മതപരമോ ധാര്‍മ്മികമോ ആയ വീക്ഷണങ്ങള്‍ എന്താണ്?
4. ചുമതലാബോധമുളള ഒരു പങ്കാളിയുമായാണ് സെക്സിലേര്‍പ്പെടേണ്ടത് എന്ന് നിങ്ങള്‍ കരുതുന്നുണ്ടോ?
വ്യക്തിപരമായ വീക്ഷണങ്ങളുടെയും ലക്ഷ്യങ്ങളുടെയും വിരുദ്ധധ്രുവത്തിലാണ് ആദ്യ സെക്സ് എന്ന അനുഭവം നില്‍ക്കുന്നതെങ്കില്‍ അതിനു മുതിരാതിരിക്കുക.
പങ്കാളിയുമായുളള ബന്ധം പരിശോധിക്കണം
ലൈംഗികതയെക്കുറിച്ച് നിങ്ങള്‍ക്കും പങ്കാളിക്കും സമാനമായ വീക്ഷണമാണോ എന്ന് പരിശോധിക്കണം. ലൈംഗികതയെക്കുറിച്ചുളള സങ്കല്‍പങ്ങള്‍ പരസ്പരം തുറന്നു സംസാരിക്കാന്‍ പോലുമാകുന്നില്ലെങ്കില്‍ സെക്സിനെക്കുറിച്ച് ആലോചിക്കുകയേ വേണ്ട.
പങ്കാളികളില്‍ ഒരാള്‍ സെക്സ് ആഗ്രഹിക്കുകയും മറ്റെയാള്‍ അതിനു തയ്യാറല്ലാതെയുമിരുന്നാലോ! കരഞ്ഞും കാലുപിടിച്ചും മുഖം വീര്‍പ്പിച്ചും കാര്യം സാധിക്കാന്‍ പല കാമുകന്മാരും വിരുതന്മാരുമാണ്. എന്നാല്‍ കാര്യം നടന്നു കഴിയുമ്പോള്‍ പിന്നെ കണ്ടഭാവം പോലും കാണിക്കാതെ തിരിഞ്ഞു നടക്കുകയും ചെയ്യും. വഞ്ചിക്കപ്പെടാനുളള ചെറിയ സാധ്യതകള്‍ പോലും ഒഴിവാക്കണം.
ആദ്യ സെക്സിലേര്‍പ്പെടാന്‍ സ്ത്രീ വിമുഖയാകുന്നതിന് മേല്‍പറഞ്ഞ ഒട്ടേറെ കാരണങ്ങള്‍ ഉണ്ടാകാം. അവയ്ക്ക് ചെവി കൊടുക്കാനോ അത് മനസിലാക്കാനോ കാമുകന്‍ തയ്യാറാല്ലെങ്കില്‍ ആ ബന്ധം അപ്പോള്‍ തന്നെ വേണ്ടെന്നു വയ്ക്കുന്നതാണ് നല്ലത്. വ്യക്തിത്വത്തെ ബഹുമാനിക്കാത്ത ഒരു ബന്ധവും ശാശ്വതമല്ല. മാത്രമല്ല ആ ബന്ധം എന്നും സംഘര്‍ഷഭരിതവുമായിരിക്കും.
ഇനി രണ്ടുപേര്‍ക്കും സെക്സിന് താല്‍പര്യമുണ്ടെങ്കിലോ. അപ്പോഴും ഒട്ടേറെ ചോദ്യങ്ങള്‍ക്ക് ഉത്തരം കണ്ടെത്തിയ ശേഷമേ പ്രവൃത്തിയിലേയ്ക്ക് കടക്കാവൂ. ആദ്യസെക്സ് തങ്ങളുടെ ബന്ധത്തെ എങ്ങനെ ബാധിക്കുമെന്ന ചോദ്യത്തിന് രണ്ടുപേര്‍ക്കും ഉത്തരമുണ്ടാവുകയും ഈ ഉത്തരം പരസ്പരം അംഗീകരിക്കപ്പെടുന്നതുമാകണം. സെക്സ് ബന്ധങ്ങളെ ഊട്ടിയുറപ്പിക്കാം. ബന്ധങ്ങള്‍ വഷളാകാനും സെക്സ് കാരണമാകും.
പരസ്പരമുളള ശ്രദ്ധയും വിശ്വാസവുമാണ് ബന്ധങ്ങളെ സുദൃഢമായിരിക്കുന്നത്. ദൃഢമായ ബന്ധത്തില്‍ സെക്സ് മനോഹരമായ അനുഭവമായിരിക്കും. എന്നാല്‍ സെക്സുളളതു കൊണ്ടു മാത്രം ഒരു ബന്ധവും ദൃഢമാകണമെന്നില്ല.
